Mōteatea -Hone Wharemate

Ka Noho Mai Kaharau
I roto o Hokianga whakapau karakia Ka tukua mai ra tana manu aute Tuhoronuku e i
Ki roto i te riu o Taiamai
Ki te rapu kainga
Mo ana uri maha ei
Ka piki taku manu
Ka tiu taku manu
Ka hoka taku manu
Ka whakatopatopa i runga o te pa o Ahukina
Ka tau ki te take o Puketona I raro i te pa o Pakinga ei
Ka kata nga puriri o Taiamai
Tona ukuinga ko parawhenua mea Nga taumata nohoanga o te Uritaniwha o Ngati Rahiri, o Ngapuhi Nui Tonu e
Tu mai Whakarongorua
Whakarongo ra ki nga tai e rua
Ko te taitama tane i te uru
Ko te taitama wahine i te rawhiti
Ko te ripo haranui i waho Mapuna
Ko te tai herehere riri i Pikopiko i whiti e
Hapaia ra te ara Uenuku
Nga pae iri mai i runga o
Hikurangi ko Whiria ra
Te Paiaka o te riri te kawa o Rahiri e
Tera te marama
Ka mahuta i te pae, he manu rere ata
I runga o Waiwhariki, He taua i taiheke mai
no Ngati Maru e
Ka tokia taku kiri
ki te rere ua o te po, E riwha nei taku rae ma wai ra
e ranga taku mate
Ma Puhi Kai Ariki
Ma Puhi Taniwharau
Ma Puhi Moana Ariki e
Koritorito te ahi ki Waitangi
He mumu tai
He wawa whenua
He taniwha horo whenua ko te Tīriti e
Ka whakarauika Ngāpuhi
Ka tu te tautara o Rangihoua Kia tau iho ki Oihi
Ko te whakapono e
Hei a haha
Ka nukunuku
Ka nekeneke
Ka nukunuku
Ka nekeneke
Titiro ki nga tai o Tokerau, E hora nei ki tua
Me he pipiwharauroa takoto te pai i
Takoto te pai